تازہ غزل

 

تازہ غزل 

۔۔۔۔۔۔۔۔۔۔۔۔۔۔۔۔۔۔۔۔۔۔

 

جب بھی فرصت ملے اک نظر دیکھنا
اپنے اونچے محل سے ادھر دیکھنا

تنگ آ جاؤ محلوں چوباروں سے جب
میرا کچا سا، ٹوٹا سا گھر دیکھنا

چاند بننے میں کوئی قباحت نہیں
اس سے پہلے مگر چاند پر دیکھنا

حاکم وقت جاگے ہیں پھر نیند سے
آج پھر جائیگا ایک سر دیکھنا

بارشیں بھی تو آئیں نہیں اس طرف
کیسے بھیگے پرندوں کے پر دیکھنا

دل کی باتیں نہ سننا مگر اک نظر
دل کے آنگن میں سوکھے شجر دیکھنا

تیرے گھر سے پرے بھی ہیں کچھ منزلیں
ہم نہ لوٹیں گے اب عمر بھر دیکھنا

کون کہتا ہے قائیل نہیں ہوں گے ہم
ہم تو چاہتے تھے تیرا ہنر دیکھنا

سرفرازان الفت بھی مارے گئے
اب نہ اٹھے گا کوئی بھی سر دیکھنا

ہم کو کیا پتھروں سے تو رکھ دوستی
تیرا شیشے کا لیکن ہے گھر دیکھنا

ساتھ جینے کو راہرو ہی کافی نہیں
ہم سے ملتے نہیں ہمسفر دیکھنا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بقلم خود (زعیم مشتاق)